पुणे : ‘स्त्रीला मुलगी, पत्नी, आई अशा अनेक भूमिकांमधून जावे लागते. त्यामुळे घरून सहकार्य मिळाले नाही, तर बाहेर काही काम करणे शक्य होणार नाही. आम्हाला माहेरून आणि सासरहूनदेखील पाठिंबा मिळाल्याने इथपर्यंत पोहोचू शकलो,’ असा सूर नृत्य, गायन, मेकअप क्षेत्रातील मान्यवर महिलांनी व्यक्त केला.
पुण्यातील हिंदू महिला सभेच्या वतीने जागतिक महिला दिनाच्या औचित्याने ‘आम्ही मायलेकी’ या कार्यक्रमाचे आयोजन करण्यात आले होते. गप्पा, गाणी व नृत्य यांची खुमासदार मैफल आणि मुलाखती आदींचा त्यात समावेश होता. ज्येष्ठ गायिका अनुराधा मराठे व कन्या अंजली मराठे यांचे गायन, ज्येष्ठ भरतनाट्यम नृत्यांगना डॉ. सुचेता भिडे-चापेकर व कन्या अरुंधती पटवर्धन यांचे नृत्य यांचा आनंद सर्वांना घेता आला. तसेच या चौघींसह मेकअप आर्टिस्ट शिल्पा बापट व कन्या सानिका बापट यांच्याशी शुभांगी दामले यांनी संवाद साधला. या वेळी हिंदू महिला सभेच्या अध्यक्षा सुप्रिया दामले, ‘कलाक्षेत्र साडीज’चे उर्मिला व सागर पासकंटी, ‘सिल्क अँड सॅटिन ब्युटी पार्लर’च्या मोनिका पाळंदे आदी सभासद व मान्यवर उपस्थित होते.
या वेळी सगळ्यांनी आपापल्या करिअरच्या प्रवासातील आठवणींना उजाळा दिला. गाणी, नृत्याभिनय आणि किश्श्यांची खुमासदार मैफल या वेळी रंगली. काही दृकश्राव्य फितीही या वेळी दाखविण्यात आल्या. यावेळी अंजली मराठे यांनी शारदावंदन गायले व अरुंधती पटवर्धन यांनी ते नृत्यातून सादर केले. समारोपावेळी अनुराधा मराठे यांनी ‘सर्वात्मका शिव सुंदरा..’ ही रचना गायली आणि डॉ. सुचेता भिडे-चापेकर यांनी नृत्य सादरीकरण केले. सानिका बापट यांनी या वेळी मेक-अपचे प्रात्यक्षिक दाखविले.
सुचेता भिडे म्हणाल्या, ‘माझ्या वडिलांना कलेची आवड असल्याने मला नृत्य शिकवायचे असे त्यांनी मी लहान असतानाच ठरवले होते. यात माझे करिअर व्हावे यासाठी ते कायम प्रयत्नशील असायचे. तीच साथ मला लग्नानंतरही मिळाली. वडील चित्रकार होते. चित्र आणि नृत्याचा खूप जवळचा संबंध आहे. तो उलगडत असताना मला नृत्य अधिकच उलगडत गेले.’
आईविषयी बोलताना अरुंधती म्हणाल्या, ‘आईला नावीन्याची आवड असल्यामुळे तिच्या अनेक लहान गोष्टींमधूनही खूप शिकायला मिळते. सर्जनशीलता आणि पारंपरिकता यांचा ती खूप छान मेळ घालते.’
अनुराधा मराठे यांनीदेखील आपला प्रवास उलगडला आणि घर सांभाळून गाण्याची आवड कशी जपली याच्या आठवणी सांगितल्या. ‘आईचे गाण्याचे क्लास घरात चालत, ते ऐकत ऐकत मी आपोआप शिकत गेले. तिच्या इतर शिष्यांबरोबरच माझेही शिक्षण झाले,’ असे त्यांची कन्या अंजली यांनी सांगितले.
शिल्पा बापट व कन्या सानिका बापट यांनीदेखील आपले अनुभव सांगितले व प्रात्यक्षिकातून काम रसिकांसमोर मांडले.
